مرض فيروس كورونا (كوفيد-19)  و كيفية حماية نفسك منه . 

- بالنسبة لموضوع كورونا فهو حاليا أشبه بحرب، وأنت يمكن لأول مرة في حياتك رح تكون جندي حقيقي مكلف بمهام ضرورية عشان ما تنهزم، وطبعا في الحرب قيام الفرد الواحد بدوره هو أسرع طريق للنصر، خليني قبل ما احكيلك عن دورك أقولك هالشغلة:

** الخبر السيء هو إن كل شخص على كوكب الأرض لازم يواجه الفيروس، بنسبة تكاد تكون مؤكدة أنت رح تحتك بالفيروس مرة واحدة على الأقل، السؤال حاليا هو متى رح تشوفه مش هل رح تشوفه أو لا، لأنه واقع بالفعل بس ما بخوف ..

** طبعا في خبر حلو بقول إنه هذا الفيروس مش رح يقدر يهزمك ويمرضك إلا إذا، إلا إذا، سامع كمان مرة إلا إذا، قطرات الرذاذ الي بتحمل داخلها الفيروس دخلت في أنفك، أو فمك، أو عينيك (بنسبة أقل)، فعشان تنصاب بالفيروس لازم يدخل من الـ3 منافذ الي ذكرتها، وبرضو الفيروس لا يخترق الجلد، يعني من الآخر، عشان تصاب بالفيروس، لازم تكون لمست، قبلت، عانقت شخص (أو جسم صلب) عليه الفيروس، وبعدها رفعت إيدك لأنفك أو فمك أو عينيك، وبعدها الفيروس يبدأ بالدخول لجهازك التنفسي عشان يهاجم جسمك ..

- في ضوء ما سبق الكلام الي بدك تقرأه حاليا لو التزمت فيه بنسبة كبيرة فأنت رح تحمي نفسك من الإصابة بالفيروس بنسبة كبيرة ومش بس بتحمي نفسك وإنما بتحمي آلاف وربما ملايين البشر:

مرض فيروس كورونا (كوفيد-19)  و كيفية حماية نفسك منه.

1. لا تحط إيدك أبدا على فمك أو مناخيرك أو عينيك، ولو ما بتقدر تتحكم في هاي الشغلة التزم بملاحظة رقم 2 ..
2. اغسل إيدك بالماء والصابون لمدة 20 ثانية، حك إيديك الثنتين بشكل قوي بحيث تزيل أي جراثيم وفيروسات عليهم، والماء والصابون متوفرين في كل مكان، مش لازم ديتول، مش لازم كحول، (لو وُجدوا خير وبركة) لكن الماء والصابون كافيين جدا ..
3. الغي السلام والمباوسة (التقبيل) مرحليا، واحرص على مسافة (1-2 متر)، طيب افرض سلمت أو قبلت حدا شو تعمل؟ أهم شي لا تحط بعدها إيدك على عينيك أو فمك أو أنفك، والتزم بملاحظة رقم 2
4. الطلعة بدون سبب ضروري بلاها، ولو طلعت لا تلمس أجسام غريبة، حافة كرسي التاكسي ، ماكينة ختم البطاقة، لا تسند إيدك على الدرج أو الدربزين، يعني من الآخر، أول ما تطلع من بيتك حط إيدك في جيبتك ولا تطلعها إلا للضرورة القصوى وخلي معك هايجين عقمها باستمرار وأظن هاي بسيطة ..
5. لما تعطس استخدم فاين وبعدين ارميه في مكان مخصص بشكل مباشر، وإذا ما معاك فاين امسح في كمك، لا تستحي ولا تخجل، حط وجهك في كوعك على البلوزة أو الجاكيت واعطس فيه، بس اوعى تعطس أو تكح في إيدك لانه هاي أسرع وأخطر وسيلة لنقل الفيروس، والتزم بملاحظة رقم 2 ..
6. القفازات والكمامات ما الها اي داعي إذا ما كنت عامل في المجال الطبي، الفاين ومطهر كحول (60% أو أكثر) بكون أكثر فائدة لا تشجع جشع تجار الأزمات وتشتري كمامات بأضعاف ثمنها الأصلي ..
7. لو حسيت بأعراض الفيروس، الي هي ارتفاع درجة الحرارة (فوق 37.3)، السعال (الكحة الناشفة المستمرة)، الرشح، وأعراض الإنفلونزا الي بنعرفها لازم تروح على أقرب مستشفى، ولو كنت بعيد اعزل حالك لحد ما تقدر توصل مستشفى ولا تسلم على حدا ولا تطلع من البيت بالمره والتزم بملاحظة رقم 2..
8. لو عملت كل المكتوب فوق الفيروس مش رح يصيبك بإذن الله، ولو صار وأصبت بالفيروس فالإحصائيات لحد اللحظة بتقول إنه نسبة الشفاء من الفيروس مرتفعة جدا، بس بحتاج منك تقوي جهاز مناعتك، ولازم تلتزم بملاحظة رقم 2 ..
9. ابني أو بنتي الصغار ايش اعمل معهم؟ بعد قرار وقف الدراسة وقفوا الدروس كلها وابعدوهم عن التجمعات والطلعات للملاعب والحدائق وغيره، وخليني أطمنك عشان ما تظل قلقان، لحد اللحظة نسبة الوفيات للفئة العمرية أقل من 9 سنين 0%، ومن 10 سنين لـ40 سنة 0.2%، وبعدين بتزيد عند المرضى الي عندهم أمراض مزمنة زي الضغط والسكري والتدخين وأمراض القلب والشرايين ..

- طبعا لما تفتح السوشيال ميديا رح تشعر إنه العالم نهايته قربت، ورح تشوف أجواء من الرعب والخوف وناس بتهول الموضوع وطبعا هذول ضررهم أكبر بكثير من الفيروس نفسه، الناس في أمريكا وأوروبا نزلوا يشتروا كل المنتجات في المولات بسبب سيطرة الذعر عليهم، هذا تصرف مش صحيح، إحنا في معركة مع الوقت، بنحاول نكسب وقت لصالح البشرية، العلاج قريب وكثير مؤسسات أعلنت عن وصولها لنتائج ممتازه ودخولها قريبا لحيز التصنيع للقاح، لكن لحد ما نحصل عليه دورنا يتلخص في تقليل عدد الإصابات لأدنى حد ممكن من خلال اتباع الإجراءات السابقة.